Bali Studies

Nyungsung Mobil

Enjoy the first posting in Balinese! From http://www.balipost.co.id/BaliPostcetak/2006/11/19/ort1.html

(olih Mas Ruscitadewi)

Di Bali koné bekan anaké magama Hindu. Sakéwala Hindu ané éncénan, Hindu ané paek dija, sukeh baan ngabagin.

“Yéh, magama to nak sing dadi gabag, sing jadi jabag,” kéto pidatoné Gedé Idé Bagus Dogén dugasé mara teka uli India.

“Magama né penting sing dadi degag, sing dadi degag jak nyama braya, sing dadi degag jak gumatat gumitit, sing masih dadi degag jak gumi,” kéto buin Gedé Idé Bagus Dogén mabarang.

Men pineh-pinehin beneh munyiné Gedé Idé Bagus Dogén totonan. Sakéwala benehé di munyi, benehé di idé, nanging di bikasé sing karuan beneh. Jelékné bikasé énto ané ngenah. Yén bikasé nungkalik jak idé lan munyiné sinah kal sing ada ané ngugu. Kal oranga buka bakakan polé, tutur melah, bikasé jelé. Patuh cara timpal tiangé totonan.

Tiang inget duges ia ajakina luas ka karaoké ajak timpalné.

“Péh sinampurayang tiang ten dados mrika, tiang nak nyungsung,” kéto abetné. Sawireh timpalné nak Bali sajan-sajanan, sing ia bani maksa. Yén maksa, takut ia dukain Ida Betara, takut ia kapongor. Dugas timpalné magedi takonang tiang ia.

“Péh pang sing ngawag-ngawag, jeroné nyungsung Betara ring dija ngih?” alus tiang matakon. Jeg ngrekek ia kedek, “Aké anak nyungsung keneh padidi, ” keto abetné.

Makelo tiang nengil, ngeneh-ngenehang munyiné. Sajan-sajan dueg ia.

Makelo sajan tiang sing matepuk ajak Gedé Idé Bagus Dogén. Kéwala alasanné nolak ajak-ajakan anaké ané sing kademenang, miluin tiang. Yén adé anak ngajak tiang katongosé jelé, tiang sing nyak tur ngorahang nyungsung. Yén ada anak ngajak tiang ngajeng ané jaen-jaen kéwala tiang sing ngelah pis, orang tiang masih sing dadi krana nyungsung.

Dibi dugesé mentas di arepan purin gubernuré, jag dingeh tiang ada anak kauk-kauk, ngelurin adan tiangé. Munyiné cara Gedé Idé Bagus Dogén. Alihin tiang di beten punyan celanginé sing ada. Peleng tiang di duur dokaré sing ada, cingakin tiang di sisin Lapangan Puputané sing masih ia ada. Paling tiang kipek-kipek. Jeg ada mobil Mercy majalan adéng-adéng. Kacan mobil mewahé énto mabukak, uli ditu suba Gedé Idé Bagus Dogén kauk-kauk. Ngaukin tiang, ngaukin anaké ané liwat. Bengong tiang ngatonang solahné. Sing madaya tiang kal ngelah timpal negakin mobil méwah.

Buin kejepné teka ia ka kosan tiangé.

“Pih, luung sajan asanné negakin mobil mewah puk,” kéto ia sambilanga nyemak koran anggona mailih-ilih.

“Tawang ci, ajin mobilé?” buin ia matakon. Tiang nengil, sing bisa masaut, sing nawang kija lakun patakoné.

“Di Bali biasané anaké nyungsung Betara di Besakih, Betara di Batur miwah ané lénan. Jani nak jaman global. Betara ané sungsung masih uli milehan. Jani bek anaké nyungsung betara uli Jepang, Jerman, tur Amerika. Mirib sangkaning ius jaman ané setata malaib, sungsungan krama Baliné milu malaib, makecos tur macuet. Krama Baliné jani liunan nyungsung mobil,” ia nyumuin mapidato. Tiang enggang.

“Sing percaya? Tegarang nengil awai di Jalan Diponegoro Dénpasar. Tlektekang sakancan mobilé ané liwat. Yén sing maan ketékan liu, sinah putengan matané. Sakéwala yén sing kuat iman, cara I Gedé Sugih Orta jag bisa ngetél paesé. Yén sing kéto jag siut-siut cara suud naar rujak lalah, naenang edot. Soalné sakancan mobil terbaru uli pabrik ada di Bali. Mobil ené sing ja gelah anak sugih dogén, mobil masih gelahanga tekén anak ané makinkin sugih. Lénan kén to mobil masih sungsunga tekén anak ané dot sugih, ané mapi-mapi sugih, ané dot kadéna sugih.”

Tiang sing bani matakon. Pang tiang ia mesuang isin basangné.

“Krana sing percaya diri, sing yakin kén sungsungan, ento ngawinang ada mobil cenik, kagedénang, ada mobil gedé kacenikang, ada mobil éndep kategehang, ada masih mobil tegeh kaéndépang. Ada mobil kapradain, ada mobil kaantikang. Sujatiné ulian pipisé kejokan,’’ buin ia mamunyi, kéwala tabuhné ngancan ngreres.

Kénkén kadén undukné, jag ngetél yéh matané.

“Tiang sing ja bes tergantung jak mobil, kéwala tiang perlu sajan jak mobil. Tiang kan jani dadi dosén, masak mahasiswané ngaba mobil dosénné negak motor, lek atin tiangé, cara sing ngelah aji.”

posted by andersonite @ 10:28 AM